RWANDA:Nord-Kivu: Imirwano iri guca ibintu. RDF yongeye kugaba igitero cyo gufata Goma

Byakuwe muri IKAZE IWACU

Amakuru agera ku Ikaze Iwacu aturutse muri Kivu y’amajyaruguru, aravuga ko mu gitondo cy’uyu munsi tariki ya 28 Kanama, 2013, imirwano ikaze yongeye kubura hagati y’ingabo za FARDC n’iza RDF/M23. Imirwano iri kubera mu duce twa Kanyarucinya, Kilimanyoka muri teritwari ya Nyirangongo. Nkuko twabibagejejeho mu nkuru yacu y’uyu munsi, Paul Kagame yasabye ingabo ze ko zigomba gufata umugi wa Goma vuba na bwangu. Ubundi yari yabahaye igihe ntarengwa ho umwisho w’iki cyumweru gishize.

LT Colonel Joseph Karegire, umwe mu bagabye ibitero by'uyu munsi

Bijya gutangira humvikanye uruhererekane rw’amasasu hagati ya M23 na FARDC rwatangiye mw’ijoro rishyira uyu munsi tariki ya 28/08/2013 ahagana sa mbiri z’ijoro. Urwo rusaku ruza guhagarara ahagana sa yine z’ijoro. Ibintu byaje guhinduka ubwo mu gitondo cy’uyu munsi humvikanye amasasu menshi y’imbunda ziremereye hagati y’impande zombi mu gace ka Kanyarucinya, Mutaho na Kibati aho FARDC yakoresheje n’indege mu guhangana na M23 ubu imaze gusubira inyuma! Ahagana mu ma sa yine za mu gitondo, nibwo ibisasu byaguye ku butaka bw’u Rwanda mu duce dutandukanye tw’akarere ka Rubavu.

Kubera rero FARDC isigaye yarabaye inkazi, ingabo za RDF zahuye n’ingorane zikomeye, ziricwa, zirakomereka, none abasirikari bayobowe na LT Joseph Karegire bari bamazeyo iminsi 3 mu rwego rwo gufasha ingabo zari zisanzweyo, bazindutse nabo bagerageza ngo barebe ko basunika FARDC, akaba rero nta gushidikanya ko ari RDF/M23 yashomboje imirwano.

Amakuru ageze ku Ikaze Iwacu mu kanya, avuye muri bamwe mu basirikari ba RDF bari ku Gisenyi, aravuga ko n’ubu FARDC yababereye ibamba. Ubu ngo hashize nibura iminota 30 ikindi gisasu kiguye ahitwa ku Munege mu kagari ka Nyacyonga, umurenge wa Busasamana, ariko ntituramenya neza niba hari abantu byaba byahitanye cyangwa se umubare w’ibintu byaba byangije. 

Abo basirikari bavuze ko indenge za MONUSCO na FARDC, arizo zirikumena amabombe nk’imvura, kandi barabona noneho ingabo zabo ziribuhashirire. Banatubwiye kandi ko ejo nijoro inkeragutabara zigera ku 1500 zambutse umupaka. Gen Major Jérome Ngendahimana, umugaba mukuru wungirije w’inkeragutabara ngo yari amaze iminsi mu gikorwa cyo gukusanya abavuye ku rugerero, ariko abenshi bari kwanga kwitabira icyo kiraka ababwira ko kizabazanira amafaranga menshi. Ntibari no gutinya kubabeshya ko bijya gusa no kujya muri mission muri Darfur.

Gen Maj Jérome Ngendahimana, umugaba mukuru wungirije w'inkeragutabara

Nyamara hari abatangiye gusobanukirwa n’amanyanga ya RDF, bakavuga ko bagiye kwihingira ko nta gisirikari bagishaka, ko ari urupfu gusa. Ingabo bashaka zihutirwa ni izigeze kurwana muri Congo zizi neza kariya karere, ngo zijye gutera inkunga forces spéciales ziyobowe na Gen Gatama Vincent. Ubu imirwano irakomeje kuko bimaze gufata indi ntera, FARDC iri gukoresha imbunda nini, yerekeza ahitwa Ruhunda. Ubu harumvikana urusaku rudasanzwe rw’amabombe n’amasasu asanzwe y’imbunda ntoya. Ikaze Iwacu irakomeza kubakurikiranira iby’iyi mirwano yadutse uyu munsi.

Gasigwa Norbert

Ikazeiwacu.unblog.fr